الجمعة، مارس 30، 2012

جلس وسمعني براكا../ إعادة نشر



السلام عليكم ورحمة الله وبركاته
ماشي كلشي على ظهر الحكومات, المسكينة..
ودولة ما دولة!!
آش دارت لينا هاد الدولة؟..خليوها ف تيقار.
اللي مابان منه الضوء شحال هذا ماشي اليوم 
نجيوا نحاسبوه ونرجموه بلا وجه حق.
الحق أنتوما فرطوا فيه زمان هذا..ماتطلبو به دابا.
الماء تقطع!
ايوا اش بغيتي ندير ليك زعما؟
عطيناكوم الماء درتوه بحال الهوا وهاك الخسران ف نعمة الله.
سييق كل ساعة, صبن كل شوية..
ارا نغسل التونوبيل بالتييو
ماكين اللي يوقف مع راسو شوية 
ويشوف منين كاتجي هاد البركة زعما!!
السد قرب يسالي..وولا كايوصلنا لبيوتنا غير الغيس مرة مرة..
وشي مناطق بعيدة ف الجبولا محال واش كايوصلها الماء مناش تشرب.
ايها المواطن ايتها المواطنة
باش يبقى الروبيني ديما عامر بالما..كييسو حتى نتوما شوية
واقتصدوا ..حافظوا على هاد النعمة من التبذير.
هذه نصيحة من وزارة الصحة!!
^^
الضوء تقطع !!
عاود تاني؟!..
آش يصحاب ليكوم ..كانجيبوه من هنا ولا..
حتى نتوما ماشي مسؤولين معانا..باش تلقاو ديما الضوء 
وقتما شعلتو البولا نقصوا شوية.
 ها انترنيت شاعل ليل ونهار
ها تلفزيون ماكايطفاش على طول العام!!
وواحد البريز ولا جوج غير كايتشودوا هنا ولهيه..
حايدوهم بركا من الاستهتار.
وعلموا ولادكم تربية الاقتصاد واحترام امكانيات الطبيعة,
 والاساسيات اللي كانعيشوا عليها حيث بلا بيها
 مانقدروش نوفروا لريوسنا الحياة المتمدنة 
اللي كايبغيها كل واحد.
هذي نصيحة من وزة الكهربا
^^
اش يصحاب لينا..
الدولة مظلومة بزاف معانا, بغينا بزاف
 د الحوايج غير هاكاك
بلا شغل ولا جهد..سياسة ارا وزيد ارا
ياك لاباس مانخافوش ولا!!
المغرب ديالنا بينا ماشي ..ماشي بشي واحد آخُر..
وبغيتي اسي محمد لو يكون حكومة كاتشخر!!
اودي ودي..تعولنا بكري بكري
خليونا نديرو اللي علينا والبقية 
على الله ونعم الحسيب هو تعالى.
لوقت قريب لقيت راسي ديما كانقول مع راسي واه
 الا بقينا على هاد الحال
ماغانقدموا ولا نزيدوا ..
والتران ديالنا تصدا وبقاا لينا زمان ف المحطة ماعاد زاد
والسبب العذور ديالنا..وميلنا للكسل والاتكالية.
براكا من مانبقاو نلصقوا ف هذا وهديك..الحل بينا ومنا
اش كلتوا ؟
كانهضر صحيح ولا غير كانخرف اوكان؟
الطريق محفورة ونعم آسي لازمنا شي حل!!
اش من حل اللي يهديك حتى نتا..وقيلا كاتسطا علي..
ملي بناو وزفتو الطريق كان عليكوم
 آنعم آس تتمشوا عليها بشوييش..
وعاود بشوييش.
الحمار حاشاكم يدوز لهيه ..برا الزفت.
 والتراكتور حتى هو يبقى برا..
انتوما بشر متخلفين ,آش كاتعرفوا ف المدينة
 ولا ف شئ تطور. .بقاو هاك نيت بوقالات حسن.
فيما تمشيوا ماتهناو حتى تفضيوه!!
مابغيت غير الخير كل خير لبلادي..
بيها انا نكون..
وبلاوطني مانسواش

0 التعليقات:

 
Copyright © 2010 مدونة اللي فرط يكرط !!. All rights reserved.