الاثنين، نوفمبر 22، 2010

الناطق باسم الحكومة

قالت ف اعتباري ، حكومة بلادي :
ما أنا إلا بشر ، عندي قلب ونظر
وانت كلك خطر ،
مابقاش تحز فيا راني غير بقر.



  وقال الشعب ف اعتباري ،بمعنى من وجهة نظري الخاصة :

كاتفرسني ، كاتقتلني مرة بالمرة
ومرة بشوية شوية..
كاتديني وتجيبني  بحال إلا راني طفل صغير عقله مازال ما عنده!
كاتعاملني بحال الا راني متشرد  ماعندي بيت ولا وطن،
وتعاملني بحال الا راني لقيط بلا أهل ولا شهادة ميلاد.
يا حكومة بلادي ، راني محترم ف بلادي و عندي وعندي وعندي،
وخا يكون ماعندي غير عقلي وكرامتي.
انت ماشي شغلك ،نكون اللي نكون
من حقي كل حقوقي.
و باسم كل مغربي ومغربية ،أنا مواطن مغربي
ومن حقي كل حقوقي.
ماشي حبسي ولا اعتقالي، ماشي جوعي ولا فقري.
أنا مغربي من حقي كل حقوقي
بزز منك باغيها كل حقوقي،
حكومة تحترم عقلي وتوقف حدود عند كرامتي،
راها حكومة بيا ،
ليا.
ماشي باش تحول حياتي لجحيم وتشويني في حياتي.
وتقدمني قربان للي يسوا واللي ما يسواش، في حياتي وموتي.
 
كاتسممني ، مغمضة وباغياني نغمض معاها
 المافيا كل وز ونايب وحده المافيا مستقلة بذاتها.
هي مصالحي وعيشتي وكرامتي ، وحقوقي اللي باغاني حكومة بلادي نغمض عليها.
ماعنديش وماشي شغلي مايكونش ، مؤمنة أن ربي الرزق من عنده
لكن شغلي أني صوتت ورفعت هذا وهذيك ، ماشي باش ياكلوني ف حلالي وف رزقي،
إنما باش يرفعوا من شأني ويبيضوا وجهي .، ويجيبوا ليا حقي.
حقي ..
آش ناهيا حق الشعب المغربي !
هي نحس براسي شخص محترم ف بلاده،
إنسان ماشي حيوان ، وحكومة بلادي دايماً يا سبحان الله
على مر الزمن ، مع تعاقب الحكومات
نفس المسألة، مضظر دايماً نصرخ بأني بنادم ماشي شي حاجة أخرى.
لكن اللي ماكنتش نفهموا أنا نفسي من قبل
هو أني - الشعب - صوتت للحيوانات، ومازلت أكررها!!
لانه ماشي معقول نكون أنا دايماً السبب والكارثة ف كل المسرحيات!!
واللي مابغاش يتفهم ليا لغاية الساعة ، هو علاش علاش علاش آعباد الله!!
علاش كلما غيرتهم ، طلع اللي قبل من اللي طالعين دابا خير !
وتوصلت إلى أنه لابد من إعادة تربية وتأهيل  الناس،
أو يمكن لابد من التخلص من الكراسي المسحورة د السلطة ف محتلف المناطق المغربية،
بكل مكان ..
في الادارات والمؤسسات = والشركات ، ف كل بلاصة .
كل مكان فيه كرسي ومسؤول، لابد من التخلص من الكراسي المتعارف عليها،
وإن لم تنفع الفكرة ، وماكانتش المشكلة ف الكراسي العتيقة ،
نجلسوا حنايا ع الحصيرة مافيها باس.
لابد نجربوا كاع  الأفكار، لأن قلبي طاب ومابغاتش هاد الحكومات تتهدى ليا،
سير الله يهديها ليا..
يارب بركا علي من تربية مرات با .
بركا علي من حكومات تبيعني بالرخيص ،
ترميني للكلاب ، من قلبها ومايهمها.
امتى انا  الشعب ، نجمع راسي ونقرر مصيري،
نكون أن الغول اللي يتخاف منه ، ماشي اللي ديما خايف.
امتى !!
نقولها لراسي امتى




لم ينتهي أبداً



و قالت :
يابنت الناس
أنا فقير ، ودراهم يومي معدودة
إنما عندي قلب كبير ، بحر شطئانه ممدودة!



* كلمات البداية والنهاية من أغنيتان مختلفتان
لعبد الهادي بلخياط.
^^

2 التعليقات:

خالد أبجيك يقول...

ما بعد الظلام إلا النور..

وما بعد العسر إلا اليسر..

فما علينا سوى الصبر، وسيأتي الله بالفرج عما قريب بإذنه سبحانه..

ومبروك عواشرك، ولو أنها متأخرة

كنت هنا..

لاتــــي Lati يقول...

أهلا خويا خالد،
ماشي متأخرة ،حيث مازال الجو د العيد.
حتى يسالي اللحم د العيد^^

أمزح طبعاً..


ايوا تفريغ وخلاص..
أما اللي غايكون غايكون.

 
Copyright © 2010 مدونة اللي فرط يكرط !!. All rights reserved.