الأحد، مايو 17، 2009

خسارة يابلادي بناسك

السلام عليكم ورحمة الله وبركاته
حنايا المغاربة, الله يعمراها دار,
وغا فينا شي وحدين قباح ماعارفين للاحترام طريق..
حنايا شعب مامربيش,ديما شاعلين المشاكل بين الخلق..
معروفين بالدعارة حيث فينا شي وحدات الله يحرقهن بالنار,
وكل اعذار الفقر والحاجة ماكاتشفعشي ليهم.
العالم كله كايتشفا فينا
لبنان ماخلا مادار وقال,برامج..أفلام غير زيد .
اللي داره من زجاج مايرمي بيوت الناس يالبنان راك مول العقل زعما!
وولا المغرب قبلة السياحة الجنسية بفضل هاد الزبالة ديال الناس,
اللي ماهمها سمعة بلاد ولاسمعة شعب.
يجينا انفلونزا طيور ولااف. خنازير, سير الله يعطي ليهم المسخ نْ شاء الله!
فضحتونا الله يسامحكوم.
مابقا حد يحترم المغرب, ولايعطيه القيمة التي كايستحقها وحارب ليها جدودنا
مع المستعمرين.
لا والكارثة انه مازال كايعاملونا خوتنا العرب على اساس اننا اقليم فرنسي!!
والشعب المغربي ماكايتكلمشي لغة غير الفرنسية!!
هي بعض من الواقع لكن ماشي عاود ثاني كلشي.
راه كاين نص آخر من الشعب أمي ماكايقشع لاعربية ولافرنسية.
وماشي ذنب الناس ان مسؤوليها مصرين على الابقاء على الوضع كما هو,
والتعامل الرسيمي -ادرات وكل اللي كاتدفع فرنسا "الفلوس"-!-
للمغرب والجزاير
باش يقري ويدرسها ف مدارسه مبكراً , ومبكراً جداً..
من الروض !!
حنايا بلاد فينا كاع العيوب , ومازال شعب طيب وزوين.
وخا خايبين مع بعضياتنا.
هذا معدي على جارو, وهذي مخاصمة مع ختها حيث ماعرفت اشنو..
وهذي خدات راجل صاحبها, وهذي ساحرة لهذاك ولا هذيك..
وراك ماتعد وتعد من ظواهر غريبة عجيبة ف مجتمعنا السعيد!
خسارة يابلادي.
آخر الزمن يتشفا فينا العديان والصديقان, ومابقا حد يراعي لا ضمير
ولاأخلاق.
والعيب كله منا, ماهمنا لابلاد ولاالله..
لاحاسب ولاحساب!
حنايا شعب ارهابي..
كانفجروا المقاهي, المباني, كانقتلوا النصارى وحتى المسلمين
كانقصدوا بلادات الناس وحتى بلادنا, 16 ماي غير كلمة واحدة
ف تاريخنا الإجرامي.
ف أي مكان من العالم تلقانا حاشرين أنوفنا ف الحروب وف الصفقات,
لكن أيضاً حنايا شاركنا في حروبات الناس, وحررناها باخلاص وحب.
لامستنينا لاتعويضات ولاتكريمات من بعد الموت.
حنايا شعب فينا النخوة والنفس,
مايقدر حتى واحد يقول علينا غير هاد الشئ.
وخايا كل العيوب راه كل دولة وبلاد فيها أكثر منا وزيادة,
علاش شي وحدين أوفياء للعْدو؟
باغين يشوهونا باش ماكان!!

0 التعليقات:

 
Copyright © 2010 مدونة اللي فرط يكرط !!. All rights reserved.