الثلاثاء، أكتوبر 21، 2008

كلشي من العجز اللي فينا



كلما حليت على قناة فضائية
إلا وأخبار على الأزمة المالية العالمية!!
أزمة مالية أمريكيية- وآعباد الله وانا مالي؟
أنا اللي خلقتها!
أنا اللي سببت أزمة مالية عالمية باش تعكروا ليا مزاجي صباح وعشية؟
ماحيلتي نهرب من أخطبوط المسلسلات اللي مدد رجليه
ف كل قناة ومحطة فضائية, زيدو عليا بالأخبار الزينة عن
البورصة وأخبار الانتحار والفقر الزاحف.
ماعندكم منين تهربوا على الفقر ..ومانخاف عليكم غير فقر الإحساس
وقلة الحياء..
والأزمة المالية ماجات غير من عمتكم أمريكا
اللي صايرين متبعينها وغادين بشوارها حتى وراتكم آش تسواو
بلاكرامة..ورماتكم ف وسط البحر
وريوني دابا آش غاديرو
خليوا ماما أمريكا تنفعكم دابا..والله يمهل ولايهمل!
الراسمالية والديمقراطية..شربوا من ميتها دابا
واماعندكم غير طريق الإسلام تشدوه وهو كل نجاتكم
ماكاين حتى حل آخُر.
عرفوا العدو ورجعوا عرفوا الغاية من وجودكم
باش تقدروا تعلموا الصواب ف حياتكم فصاعداً
أزمة مالية..أنا مانعرفكومش
ماليا رصيد بالبنك ولاعندي حصيصة مخبية تحت المخدة حتى
عندي غير ربي وعايشة باللي يرزقه ليا لحظة بلحظة
ولله الحمد..حامدينه وشاكرينه ماخصنا حتى خير
ايه..
آجي 0.0
شفتوا الهند طلعت القمر بشندريان1؟
خرجت من المستنقع للفضاء!
من هنا خصنا نتعلموا ونتواضعوا ونشدوا ف العلم
ونرجعوا لعهد المجد ..
وانا اللي كنت كانظن بأن المغرب حسن مية مرة من الهند
اللي غارقة يادلي ف الفقر والخرافات!
طلعت أنا الخرافة وظني هو الفقر بعينه..من جهلي بالمستجد الهام ف الهند
المركبة غير مأهولة ولكنه إنجاز عظيم ف تاريخ الدولة الاسيوية
ويدخلها لنادي الفضاء ..
ايوا طز ف أمريكا وحتى انجلترا..
ماخايفة من جهتنا غير نبقاو ف الارض مستحليين الجلسة
وماهمنا سما ولاأرض

0 التعليقات:

 
Copyright © 2010 مدونة اللي فرط يكرط !!. All rights reserved.