الجمعة، أكتوبر 31، 2008

يوم آخر

الحمدلله..الجو واخا ماشي ديال الخروج
كنت مصرة شوية , بغيت صور جديدة من جهة, للبحر
ومن جهة ثانية كنت باغا نغير الجو
فالاخبار هاد السيمانة =الاسبوع..كانت خانقاني بلاقياس
فيضانات وزلزال ..مقتل فلان وانفجار علان
غارة على سوريا وحملة انتخابية امريكية !!
كلما حليتي = فتحت..قناة فضائية أمطروك بتغطية لانهاية لها
 عن المرشحان والحملة المسعورة ..وانا مالي؟
زعما مالاقيتو غير أخبار دولة معادية باش تبرزطوني 
بيها ليل ونهار لا والادهى من هاد الشي كله
اااااااااااااااااااااااه
هادوك السهرات الــــــ'الفنية' ديال دوزيم والمغربية!!
لاناويين نيت يطرطق فيا شي عرق..
هادي مافيها شك.
بزاف بزاف آعباد الله..واه فيضانات ف الشمال والشرق
والجزاير ف نشراتها تتابع الفنانين دياولها ماشين للسمارة
باسم ال"مرتزقة" ديال البوليساريو..
وفي سوس اخبار عن جرف ناس
من قبل الوديان بعد أمطار غزيزة نيت..
هاد شي كلو وعند در الاذاعة والتلفزيون هانية مخيير!
بغيت شي نهار نحلى على قناة من قنواتنا ونشوف ونسمع الصوت
ديال الشارع حي وقوي. نسمع الاخبار من عين المكان بالصورة
والصوت بلازواق ولا خيال..
واه لو تتقدم شوية الاذاعة ديالنا وتقدم المادة الجميلة 
اللي كاتنفع وتستمتع
بلا ماتندم على وقتك ولا تعصبك..
ولا حتى مانقلبو على البديل عند الآخرين.
الحاصول
كانت الدنيا خاوية شي شوية..وكان الغيس شوية = الوحل
وعاد يوم السبت نزل المطر من الصباح ..
طيلة اليوم وشوية بالليل
لكن اللي بقا فيا هي الناظور وطنجة وأخبار
 عن وجدة اللي ميكو =تغاضوا عنها
ف الاخبا ر..مشغولين بالغنا والرقص
الله يهدي وخلاص
"الله يهدي" كايقولها العجائز حين إما كايقدروش على شي واحد..
كايقولها العيالات اللي ماكايقدروش على ولادهم..
ايوا الله يهديه مازال عندي أمل فينا..ف هاد الشباب
لكني كانخاف شي وقيتات =اوقات..
من اللامبالاة القاتلة اللي كاتسلل للنفس!

0 التعليقات:

 
Copyright © 2010 مدونة اللي فرط يكرط !!. All rights reserved.