السبت، يوليو 26، 2008

قاعدة إطالة العمر

هداك عْمْلْ..هذاك ماعمل!!
هذا قتل مراتو, وهذاك فجر راسو..واحد الدري (صبي او شاب) لاح راسو ف البير وواحد آخُرْ هجر البلاد وماعاد شافو مخلوق.
هذاك دارْ..وهذاك مادار والو!!
نْم نْم نم..الهضرة على الناس وحتى شئ ماقضيتيه من الكلام عن العباد..
آش بغيتي من النم والكلام الخاوي؟ باركاااااااا
يكفي بالزيادة..التفت شوية لمصالحك وتأمل عيوبك كثيراً, لاش نبقاو ليل ونهار
في سيرة الناس وبلاوي الخلق!! هذا عمل ودار وذاك صنع وصار..وانتا؟ اش درتي واش من صنعة تعلمتي وفيدتي بيها راسك وكسبتي بيها أجر لآخرتك وكسبتي منها قوت يومك؟
بلا بلا بلا بلا بلا
كثرة الهضرة والخبار الخاوي مايزيد غير همومك..وتقصر عمرك
خليك من عادتك الخايبة وركز ف راسك..وفر ثقتك لنفسك
وبركا من الغمز والسم ف عباد الله
لانو ماراكش تبغيها لراسك..ولاشك كاين شلا واحد شاد فيك وجابد ف زلاتك ..
قليل من يذكر الناس بجميلها..وكثير الناس من يذكر الغير بقبيحه ويغالي فيه.
ياابن ادم
تذكر واحدة : كما تدين تدان
اللي كاتعملو ف الناس غايجي يوم يتعمل فيك ولو عن طريق ولادك.
يعني عامل الناس كما تحبها ان تعاملك..
في السر والعلن القاعدة نفسها صالحة لكل الاوقات.
من يوم مافكرت مزيان وشوفت بأني غنية عن التحديق بالآخرين والعيش حياة جافة,
تدور عن الآخرين, عرفت أني بحاجة للسير بنظامي الخاص وليس المشي بقوانين الغرباء.
لولا تفكيري هذا لما وجدت نفسي هنا يوماً, أتفلسف على بعض مني.
وأحس بأني تغيرت وبأني بخير.

0 التعليقات:

 
Copyright © 2010 مدونة اللي فرط يكرط !!. All rights reserved.